1968-ին` Լենինականից Երևան տեղափոխվելուց հետո, Ժիրայր Մովսիսյանը աշխատել է որպես ֆոտոթղթակից «Գարուն» ամսագրում, «Հայաստան» հրատարակչությունում, «Գրքերի աշխարհ» շաբաթերթում և Հայկական հեռուստատեսությունում։ Հետագայում ուսանել է Մոսկվայի կիրառարական արվեստի համալսարանի լուսանկարչության բաժնում։ Ընտրվել է ԽՍՀՄ լրագրողների միության անդամ 1979-ին։(1)

Ֆոտո-լրագրողի գործնեությանը զուգահեռ, Մովսիսյանն իր ուժերը փորձել է նաև գեղարվեստական լուսանկարչության մեջ, որի թեմատիկ առանցքը առնչվում է բնական միջավայրին և պատմա-ճարտարապետական հուշարձաններին։ Այդ աշխատանքներում լուսանկարիչը սովորաբար ձգտում է վերհանել բնության էպիկական, գերմարդկային ուժը և պատմական կոթողների դրամատիկ վեհությունը։ 

Մովսիսյանի լուսանկարները հրատարակվել են Հայաստանին ու հայկական հուշարձաններին նվիրված բազմաթիվ լուսանկարչական ալբոմներում։ Իր գեղարվեստական ու վավերագրական լուսանկարներով նա նաև մասնակցել է մի շարք համամիութենական ու հանրապետական ցուցահանդեսների, որտեղ շահել է մրցակներ։ 

1) Վահան Քոչար։ Հայ լուսանկարիչներ, հեղինակային հրատարակություն, Երևան, 2007, էջ254

Վիգեն Գալստյան, 2016