Արմատներով Արցախից Գարիկ Ավանեսյանը ծնվել է Բաքվում, ուր ստացել է իր միջնակարգ կրթությունը, այնուհետև, Սումգաիթյան իրադարձություններից հետո տեղափոխվել է Ալմաթա։ Ղազախստանում հաճախել է համալսարան ուսանելով ժուռնալիստիկա, սակայն 1992-ին որոշում է թողնել կրթությունն ու մեկնել Մոսկվա, ուր ծավալել է բիզնես գործնեություն։ Հաջողության չհասնելով, նա կրկին արտագաղթում է 1995-ին, հաստատվելով Պրագայում։ Այստեղ էլ սկսում է լրջորեն զբաղվել լուսանկարչությամբ, որով Ավանեսյանը տարված էր դեռ պատանեկության տարիներին։ (1)

Ինտեգրվելով Պրահայի լուսանկարչական եռուն միջավայրում, Ավանեսյանը ակտիվ գործնեություն է ծավալում թե՛ կոմմերցիոն, թե՛ վավերագրական լուսանկարչության բնագավառներում։ 2002-ից նա հրատարակում է եռալեզու Photo Art ամսագիրը, որը մեծ ճանաչում է վայելում առ այսօր Չեխիայում և արևելաեվրոպական մի շարք երկրներում։ 

Կոմերցիոն կամ գովազդային լուսանկարչությանից դուրս, Ավանեսյանի ստեղծագործական պրակտիկան հիմնականում ծավալվում է վավերագրական լուսանկարչության և մերկանկարի ժանրերում։ Առավել հիշարժան են նրա` Ղազախաստանում, Ուզբեկիստանում, Կիրգիզստանում, Ռուսաստանում, Չեխիայում, Հայաստանում և հատկապես Արցախում արված բազմաթիվ վավերագրական շարքերը։ Գրեթե ամեն տարի այցելելով իր նախնիների հայրենիքը, Ավանեսյանը ներկայացնում է այն ապավինվելով դասական, մարդասիրական լուսանկարչության լավագույն ավանդույթներին։ Տեսախցիկը ուղղելով հասարակ մարդուն, գյուղացուն և երեխաներին, լուսանկարիչը արձանագրում է Հայաստանի առօրեական կյանքը առանց պերճախոս մեկնաբանությունների, դիտարկելով երկրի ու դրա բնակիչների զուգահեռները այլ մշակույթների և ազգերի հետ։ Հովերգական ու նոստալգիայով լի այդ մոտիվներում, «Արևելքը» բացահայտվում է ոչ թե որպես էկզոտիկ մի դրախտավայր, այլ կյանքի արմատական օրակարգն ու հակասությունները պարզորոշ արտացոլող մի միջավայր։ Թեև այդ շարքերը որոշ դեպքերում մոտենում են պարզունակության ու սենտիմենտալության շեմին, Ավանեսյանի հայացքը մնում է անբասիր և հուզող իր համամարդկային եզրեր փնտրող դիրքորոշման մեջ։ 

Շուրջ 20 տարվա ստեղծագործության ընթացքում, Ավանեսյանը ցուցադրել է իր աշխատանքները հիսունից ավել անհատական և խմբակային ցուցահանդեսներում և հեղինակել մի քանի ֆոտոգրքեր, որոնցից վերջինը` «Գարիկ Ավանեսյանն ու իր հայերը» ներկայացնում է լուսանկարչի հայկական ճամփորդությունների ընդհանուր համայնապատկերը։ 

1) Лилит Мкртчян. '«Посредством фотографии мы пишем свою биографию» — Гарик Аванесян', 2016, http://barev.today/news/garikavanesyan

Վիգեն Գալստյան, 2016