1970-ականների սկզբից ի վեր Ֆելիքս Առուստամյանը աշխատում է ֆոտոլրագրության բնագավառում, այժմ ղեկավարելով «Արմենպրես»-ի ֆոտոխրոնիկայի բաժինը։ Լուսանկարչությամբ զբաղվել է պատանեկան տարիներից, հաճախելով Երևանի պիոներ-պալատի ֆոտո-կինո խմբակը։ Հակված հատկապես սպորտային միջոցառումների վավերագրմանը, Առուստամյանը 1973-ից աշխատանքի է անցել «Հայաստանի ֆիզկուլտուրնիկ» թերթում, որպես հաստիքային լուսանկարիչ, իսկ անկախությունից հետո, 1991-ին, միացել է «Արմենպրես» գործակալությանը։ (1)

Առուստամյանի 1970-2000-ականներին արված լուսանկարները լրատվական բնույթի են` դեպքերի արագ որսած արձանագրումներ որոնցում լուսանկարիչը ջանացել է ստանալ տեսողական փաստարկների առավել հստակ, սուբյեկտիվ «ձեռագրից» զուրկ պատկերներ։ Լրագրողական նատուրալիզմին հարող այս լուսանկարների նշանակությունն այսօր առնչվում է դրանց պատմա-վավերագրական, արխիվային գործառույթին։

1) Լուիզա Ավագյան։ «Ֆոտոլրագրության մեջ արգելքներ չկան. Ֆելիքս Առուստամյան», www.slaq.am, http://www.slaq.am/arm/news/1083065/

Վիգեն Գալստյան, 2016