Կոնստանդնուպոլսի Գեղարվեստի վարժարանում (1887-1891թթ) ապա Հռոմի Գեղարվեստի Ակադեմիայում սովորելուց հետո, Արշակ Ֆեթվաճյանը իր կյանքը անցկացրել է Եվրոպայի, Ռուսաստանի, Հայաստանի և, կյանքի վերջին տարիներին, ԱՄՆ-ի տարբեր քաղաքներում։ Մասնագիտացել է պատմական և ճարտարապետական գեղանկարչության մեջ և, Վարդգես Սուրենյանցի հետ մեկտեղ, եղել է առաջին հայ արդի ձևավորող նկարիչներից։ 1900 թվականին այցելել է Արևելյան Հայաստան, որտեղ ստեղծել է հայ ճարտարապետական կոթողները պատկերող շուրջ 2000 գրաֆիկական աշխատանքներ։ Հատկապես արժեքավոր են Անիում և շրջակայքում արված հուշարձանների նրա արտանկարները որոնք այսօր ունեն մեծ պատմական արժեք։(1)

Ֆեթվաճյանը ականատես է եղել Ցեղասպանության անմիջական հետևանքներին և իր աշխատանքներում արտացոլել է այդ ողբերգական գույժի դրվագները։ Կատարել է մակնիշների և թղթադրամների ձևավորումներ որոնք պատվիրված էին Հայաստանի առաջին հանրապետության իշխանությունների կողմից։ Կյանքի վերջին 25 տարին անցկացրել է ԱՄՆ-ում, ապարդյուն փորձեր անելով վերադառնալ Հայաստան։ Մահվանից հետո իր աշխատանքները կտակել է Հայաստանի հանրապետությանը և դրանք այսօր գտնվում են Հայաստանի ազգային պատկերասրահում, արվեստագետի հարուստ արխիվի հետ մեկտեղ։ 

Հայաստանում եղած տարիներին Ֆեթվաճյանը նաև անդրադարձել է լուսանկարչությանը, հիմնականում որպես հուշարձանների պատկերավորման համար օժանդակ նյութ։ Նկարչի արխիվում պահպանվել են այդ լուսանկարներից մի քանիսն ընդամենը։ Դրանցից հատկապես ուշագրավ են Ցեղասպանությունից փրկված գաղթականների դիմանկարները։ Այստեղ արվեստագետը զանցել է վավերագրության պահանջները ստեղծելով միանգամայն հուզիչ պատկերային կոմպոզիցիաներ որոնց գեղարվեստական արժանիքները ինքաբավ են։ Ֆեթվաճյանի գործունեության այս անտեսված կողմը կարիք ունի ավելի խոր և մանրամասն ուսումնասիրության։(2)

1) Նկարչի կենսագրության և նկարչական գործնեության մանրամասները տե՛ս մատենագրության ցանկում նշված նյութերում։ 

1) Նկարչի ստեղծագործությունները բազմիցս ցուցադրվել են իր կենդանության օրոք և մահվանից հետո։ Սակայն լուսանկարչական աշխատանքներ այդ ցուցահանդեսներում չեն ընդգրկվել ուստի այդ ցուցահանդեսների ցանկը այստեղ ներկայացված չէ։ 

Վիգեն Գալստյան, 2016