Հայաստանում խորհրդային կարգերի հաստատումից անմիջապես առաջ և հետո, Երևանում գործող այս լուսանկարչի վերաբերյալ կենսագրական տեղեկություններ չեն գտնվել։ Հայաստանի պատմության թանգարանում պահվող նրա լուսանկարների հավաքածուն հիմնականում առնչվում է Արաբկիր թաղամասի բնակիչներին, որոնց մեծ մասը Ցեղասպանության վերապրածներ էին, ինչպես և` պետք է ենթադրել, լուսանկարիչը նույնպես։ Անպաճույճ իր դիմանկարներում, Մաթևոսյանը արձանագրել է չարքաշ կյանքով ապրող գյուղացի մարդկանց, որոնց աղքատիկ կենցաղն ու մաշված հոգևիճակը լուսանկարիչի պարզունակ պատկերները փոխանցում են մեծ հավաստիությամբ։ Մաթևոսյանը նաև ստեղծել է Արաբկիրի շրջակայքը ներկայացնող բնանկարներ ու տեղացիների ընտանեկան, աշխատանքային առօրյան ներկայացնող պատկերներ որոնք արված են ազգագրական ու վավերագրական նկատառումներից ելնելով։

Վիգեն Գալստյան, 2016