Հայկական հեռագրական գործակալության անդամ Սուրեն Խոսրոևը իր նախնական կրթությունը ստացել է Երևանի Փ. Թերլեմեզյանի անվ. նկարչական ուսումնարանում։ 1940-ին ուսումը ավարտելուց հետո զորակոչվել է բանակ և մասնակցել է Հայրենական Մեծ Պատերազմին։ Վերադառնալով Երևան, 1945-ին անցել է աշխատանքի «Կոմսոմոլեց» թերթում որպես ֆոտո-լրագրող։ (1)

Խոսրովյանի լուսանկարչական գործնեությունը հիմնականում առնչվում է ֆոտո-խրոնիկայի բնագավառին։ Հայկական մամուլում` «Սովետական Հայաստան» ամսագրում, «Կոմունիստ» և այլ թերթերում տպագրված լուսանկարները բեմականացված ժանրային տեսարաններ են, բնանկարներ և շինարարական աշխատանքների վավերագրումներ։ Այդ պատկերները իրենց բնույթով պրոպագանդիստական են ու իլյուստրատիվ։ 

Լուսանկարիչը իր գործնեության ընթացքում նաև գրել է Հայաստանի ֆոտո-լրագրողական գործը լուսաբանող մի շարք հոդվածներ։ 1970-ականներից Խոսրովյանը ըստ երևույթին հիմնականում զբաղվել է վարչարարական աշխատանքով, թողնելով ակտիվ լուսանկարչությունը։

1) Վահան Քոչար, Հայ լուսանկարիչներ, հեղինակային հրատարակություն, Երևան, 2007, էջ182

Վիգեն Գալստյան, 2016