Բախշի Խաչատրյանի առաջին քայլերը լուսանկարչությունում կապված են Պողոս Պետրոսյանի և Միքայել Պողոսյանի հետ, ում Խաչատարյանը աշակերտել է 1960-ականների կեսերին։ (1) Իր ինքնուրույն գործերը տպագրել է 1967 թվականից, հրատարակվելով «Պիոներ կանչ», «Գարուն», «Սովետական Հայաստան», «Նոր Դար», «Սովետական Արվեստ» և այլ պարբերականներում։

Ընգրկված լինելով Հայաստանի գրողների և արվեստագետների միջավայրում, Խաչատրյանը ստեղծել է մշակույթի գործիչների դիմանկարների ընդարձակ շարքեր, որոնք մինչ օրս գործածվում են տեղական հրատարակչությունների կողմից։ Լուսանկարչի ստեղծագործության շրջանակներում է նաև բնանկարն ու փողոցային լուսանկարչությունը, որում նա տուրք է տվել 1960-ականների հայկական արվեստում լայնորեն տարածված «բանաստեղծական» պատկերագրության մոտեցումներին։

1984-ին Խաչատրյանը անդամագրվել է Հայաստանի ժուռնալիստների միությանը իսկ 1995-ից աշխատել է Գրողների Միությունում որպես լուսանկարիչ։ (2)

1) Վանիկ Սանթրյան, «Լուսանկարչությունը` արվեստ», www.hhpress.am, հունիսի 12, 2010, http://www.hhpress.am/?sub=hodv&hodv=20100612_7&flag=am

2)  Վահան Քոչար, Հայ լուսանկարիչներ, հեղինակային հրատարակություն, Երևան, 2007, էջ 179

Վիգեն Գալստյան, 2016